وجع اخر قادم من العاصمة صنعاء .. "واقعة مبكية لأمرأة وابنتها الشابة"

وجع اخر قادم من العاصمة صنعاء .. "واقعة مبكية لأمرأة وابنتها الشابة"
تعبيرية

وجع اخر قادم من العاصمة صنعاء .. "واقعة مبكية لأمرأة وابنتها الشابة"

السلطة الرابعة - خاص:
تمام الساعة السابعة مساء امس الأربعاء:
عادنا مخلص صلاة المغرب واكلت وارجع اكمل التخزينة الا وابني يدخل لا عندي ياباه به ثنتين نسوان بيدورينك ...
استغربت اي نسوان يدورين حد هذا الساعة منهن يابني
مدري اول مرة ابسرهن هاهن مسنبات بلدرج ..
خليهن يدخلين ودخلين أمرأة اربعينية وبنتها.يمكن 17 سنة عيونهن ذابلات صوتهن شاحب قوي دخلين للمكان عندي بعد ما تاكدين من وجود زوجتي وابنتي ..
خير يا خاله من انتو ؟
احنا من العميري ودلنا واحد على بيتك قالو بتفعل خير مع الناس..وقد لنا بنلبج على بيتك من الساعة 5 كرهن لقيناه واقتطع صوتها باين ان ريقها جف بسبب التوتر الي لاحضته من ارتعاشه يدها.كأنها بتصعق بكهربا
بنتها لاحظت ان امها على وشك الاغما اخذت الصحه الما حقي وناولتها تشرب ويشهد الله انها شربت نص الدبه على نفس واحد العالم الله اي عطش وصل بها
قلت لها اهدئي يا خاله ارتاحي شويه. مسكتها زوجتي وجلستها قلت للبنت اتعشيتو قالت ايوه
امانه صدق اتعشيتو ما ردت
بنتي جنبها ويمكن بنفس سنها تقل لها لا تخزيش انا ساع اختش وعادنا والكل ماقد اتعشيت جي نفعل عشا انا وانتي
وكأنها ما صدقت حصلت لها كلمه لطيفه من بنت بسنها وراحين المطبخ وبقيت مع الام وزجتي تسئلها خير ياخاله ما معش ..
يابني احنا ساكنين في العميري يشهد الله ما ادانا لا عندك الا شده الحاجه والله لو يدرا ابي اننا جيت لاعندك يعلم الله ما عيفعل بي ..

انا مرمله معي 6 عيال وجالسه مع ابي واخي في بيت ايجار في العميري واخي يرحم معول وما كوده ياكل جهاله وابي مريض بلقلب وخرجت من شنطتها كراتين حق علاجات وهذه حقه العلاجات له اسبوع من حن كمل عليه وهو تاعب قوي من اسبوع ادور من الي اعرفهم والي ما اعرفهم قيمه علاج والله محد رضي يديني واليوم دخلت الديمه وراس بنتي ما لقيت فيها شي للاكل من مره جهال بيصيحو حاوعين واب بيصيح من الوجع واخي دخل لاعندي للديمه هو مريض في صدره بين اقله ياخي مابش معانا شي بلديمه ماابسرته الا حن بكا وهرب من الديمه ودخل مكانه ودخل جهاله وقفل على روحه هو وهم لوما افتجعت لا يفعل بروحه شي ويعلم الله يا ابو محمد ما اكلنا من الصبح الا اثنين روتي روحن.ابني من المدرسه ووطت عينها وبكت بصمت يوجع اي مخلوق عاد فيه شي من.انسانيه..
قامت زوجتي تواسيها وشلتها الغرفه الثانيه وانا مكاني اجاهد نفسي جهاد لا عاد اقرح بكا ..
فعلت بنتي وبنتها العشا ودخلوه للغرفه الثانيه يتعشين كلهن..عشر دقايق الا وبنتي تدخل عليا وعيونها مزججه بلدمع وهي تقلي فديت حذاتك يابه لا ما سنبت معاهن يعلم الله كم.لهن من الاكل بنتها كان قدي مصفره من الجوع الاثنين الاكياس الخبز ما كفينش وارسلت اخوها يشتري خبز ثاني ورجعت بنتي لاعندي ادت لي يمكن 5الف حقها الي بتجمعها علىميه وعلى ميتين قالت لي زد وفي لي فوقها اديها للبنت.
طيب يا بنتي انتي بتجمعيها حق بالطو قالت عذا انت موجود واحنا في خير ابسر بلطو البنت هذه كيفو مقطع هي احق بها ..
ابتسمت وحمدت الله ان جعل لي من اولادي من يحمل مثل هذا القلب الرحيم ووفيت له شي بسبط واعطيناه لهم مع وعد انشر قصتهم عل الله يسخر لهم من يكسب ويكسبنا معه اجرهم ..
هذه حاله الخاله ام ايمن ويشهد الله ما بالغت بكلمه لمن اراد المساهمه بهذا الاجر الاتصال على 775354061 لايصاله اليهم مباشره يدا بيد .
كتب الله اجر الجميع
لقمان الهمداني